MANILA — Hindi pa tapos sa boxing si Manny Pacquiao at muling babalik sa ring sa darating na Abril 18 para harapin ang dating junior welterweight world champion na si Ruslan Provodnikov sa isang 10-round na welterweight exhibition match sa Las Vegas.
Si Pacquiao, 47 taong gulang, ay huling lumaban noong Hulyo 19 laban sa WBC welterweight champion na si Mario Barrios, kung saan nagtapos ang laban sa majority draw. Dalawa sa mga hurado ang nagbigay ng tabla, habang si Max DeLuca naman ay nagbigay ng 115-113 na panalo kay Barrios.
Ang resulta nito ay nagtala kay Pacquiao ng rekord na 62 panalo, 9 talo, at 2 tabla.
“Napakahalaga sa akin na makabalik sa Las Vegas, at excited akong makatrabaho ang isang koponang nakatuon sa pagbibigay ng world-class na karanasan para sa mga tagahanga,” pahayag ni Pacquiao. “Babalik ako para magbigay ng isang kapanapanabik na laban — at handa na ako.”
Gaganapin ang laban sa Thomas & Mack Center, na naging tahanan ng maraming kilalang laban noong dekada 1990 bago maitayo ang MGM Grand Garden Arena at T-Mobile Arena, na naging pangunahing venue ng mga top fight sa Las Vegas.
Samantala, si Provodnikov, 42 taong gulang, ay huling lumaban noong Hunyo 2016, kung saan natalo siya kay dating unified light welterweight champion na si John Molina Jr. sa pamamagitan ng unanimous decision. /elami
